Anything About Hmong, We post It in this Web Address
___________________________________________________________

Hmoob "KOJ" "KUV" Tsis Txawv: Lawv muaj ze 700 tawm leej.

Febuary 6, 2007
UNHCR yog txog sia. "Peb nyob rau hav zoo los yuav tuag, tawm mus thawj Nplog Liab los yuav tuag, lam los rau ntawm no, coj peb lub cev los nuv koom haum ncaj ncees ntiaj teb seb txoj sia nyob taus tsawg hnub ntxiv." Hais Pob Tsuas Vaj. Poj niam me nyuam 6,7,8 leej ib yig twg. Xauj thaib cov tsev loj luaj leej twg ib cha tsev nyob xwb. Pwv kuj yog ntawd, noj los ntawd, nyob los tib qho chaw (shelter). 30 xyoo txoj kev ua neeg, ua ua laus nkoo, me nyuam xeem yug hnub nyoog muaj 30 xyoo. "Cov raug kev puas tsuaj ntau heev hais tsis tag." Nyiaj Thoj Yaj tham.
Cov me nyuam nkaum hauv tsev tas hnub, hmo, vas thiv, hli, tsheej tog xyoo cuag kaw rau hauv nkauj. Tus pees piab, phob vog, tuag tes tuag taw, kawj mob dab tsi muaj tag. Qhov lawv tsis tawm twb yog cov tub ceev xwm Thaib ntes ntes lawv tas zog. Feem coob ntawm 700 tawm leej no yog neeg UNHCR nrhiav tau lawv muaj teeb meem hauv lawv tus Nom Tswv Nplog. Lawv muaj ntaub ntawv UN, yog neeg tawg rog raws txoj cai ntiaj teb. Tab sis Thaib ntes yeej tsis khuv xim leej twg hlo. Tej tus thaum tub ceev xwm txhom tau muab ntaub ntawv UN rau saib kuj tso. Feem coob raug tub ceev xwm muab ntau, caws, thiab muab khuj nyiaj mam tso. "Yeej tsis tau luag tawm ntawm koj qhov chaw nyob mus qhov twg" Pob Tsuas qhia.
Lawv los nyob rau niag moos, tsev 8-9 txheej, fais fab ntsa iab, tsheb khiav sib txiv qe, thiab neeg ntom nti ntawm tej kev qab vag tsib taug. Txawv tas zog pem hav zoov lawm. Txawm yuav txawv npaum cas los lawv tseem cus plias xwb. Yog leej twg tsi ceev faj zoo kev tsim, quab yuam, mag ntaus thiab poob nyiaj tub ceev xwm Thaib yeej tsis paub khuv xim koj hlo.
T ag nrho 194 leeg nyob rau hauv ib lub tsev xauj. 153 leeg tawm pem hav zoov los, 41 leeg khiav Nyab Laj Teb los vim txoj kev tsis ncaj ncees Nyab Laj tsim ntawm kev tseeg Vaj Tswv. 41 leeg cov tswv cuab Thaib Church muab nyiaj mus xiab Koos Npos Kos Txawv Teb Chaws tsis pub xa rov qab. 153 leeg neeg Hmoob, lawv cov teeb meem yog raug Nplog raws tawm los. Tsis muaj leej twg cawm. Pab no raug xa mus rau Nong Khai ciam teb Nplog thiab Thaib sib npuab.
Pab neeg 194 leeg no lawv qhov kev raug ntes yog Thaib foob lawv rau tom Koos Npos Kos Ntes Neeg Nkag teb chaws tsis raws kev cai. Lawv cov teeb meem "cov me nyuam coob hwv, qws heev, thiab tsis thoob pej xeem nyob hauv moos, cov neeg nruab zog foob mus 2-3 zaug. Tus tswv tsev thiab tus tswv zos muaj kev tsis sib haum nkawv ua yeeb ncuab sib tog txog nyiaj txiag, tus tswv zos foob mus rau nram Koos Npos Kos. Tsis tas li ntawd, thaib los yeej nrhiav tshuav cov neeg Hmoob no ntes xwb thiab. Yog lawv tes tau tsawg leej ces tub ceev xwm khuj nyiaj xwb tso lawm. Yog thaum coob hwv lawm, lawv kuj tsis paub yuav khuj tau nyiaj li cas thaum no lawv yuav tau xa raws kev cai." Ib tug Paster Thaib piav cov kev pab neeg hais saum no mag ntes. Nws hais ntxiv tias "yeej tsis ncaj ncees lawm, vim cov neeg no muaj ntaub ntawv hauv UN. Tsim nyog tiag txoj cai yuav tau xyuas kom khav." Leej twg tham twb muaj kev hlub txog pab neeg no. Leej twg los yeej xav pab. Tsis muaj leej twg pab. Lawv ev rawv lub txim, lawv ua hnub ua hmo nyob nkuaj tam leej twg qhov me kev npau suav. Nplog yeej hawv laws yuav xa kom tau rov qab mus rau hauv Nplog teb xwb. Thaum 12 hlis 2006 dhau los Thaib thiab Nplog tau kos npe ua pov thawj sib pab xa kom tau cov neeg Hmoob no rov qab mus rau hauv lub teb chaws Nplog. Tus Prime Minister Thaib tshiab los kuj yog ib tug thawj tub rog xwb thiab, yeej yog siv ib txog cai quab yuam, dag, thiab ntaus ntau xwb kom cov neeg no cia li rov qab. Thaib tsis xav mloog neeg ntiaj teb txoj cai hais hlo. Thaib yuam qhi xa kiag cov Hmoob no mus rau hauv Nplog. Thaum 1 hlis yov luag nqig, Nplog xa tau ib cov tub ceev xwm tuaj xam phaj pab 153 tus Hmoob hauv Nong Khai. Nplog hais rau lawv kom lawv cia li zoo siab mus rau hauv lub teb chaws Nplog xwb. Nom Nplog mas yuav hlub lawv, yuav tsis muab txim dab tsi rau lawv, kev txhaum yav tag los laim kiag nrog dej Naj Khoom ntws nto mus. Rov mus nyob ywj siab, ua liaj ua teb, mus nrog kwv nrog tij, nrog niam nrog txiv nyob kaj siab lug. Hais zoo cuag li qaum ntuj tawg paj paug, ntiaj teb laim txais cua laj ntxiag. Siab plawv yeej tsis muaj leej twg paub tau. Nplog yeej ib txwm nyiam dag kom Hmoob mloog kev tuag lawm.
Thaum hnub tim 30, lub 1 hlis, 3 lub Bus nres ntua ntawm nkuaj ntiab tsuag tsuag cov me nyuam, poj niam rau hauv bus. Cov txiv neej tawv npaum pob zeb, tuag twb tuag ntawm no, tsis zoo siab mus tuag hauv Nplog lawm. Lawv sib dawj tau 5 teev ntev. UNHCR mam xa tau ib yawg tuaj daws cov teeb meem dhau. Los tau ib lub lim tiam no, pab neeg no tseem nyob rau hauv Nong Khai. Tsis paub hais tias hnub twg Nplog twb yuav rov tuaj muab lawv nyiag mus. Nplog hawv qaws yuav tuaj ua lub txias txias lawm xwb kom ntiaj teb txhob hnov hlo. Nplog hais rau Thaib tias cov tub zov nkuaj ua hauj lwm txia dej hwv thiaj thauj tsis tau pab neeg no hnub 30, ib hlis 2007 dhau los no. Yog thaib txhob ua lwm mob tes mob taw li no mas hauj lwm twb ntseg lawm. Cas Nplog ho yuav xav tau pab neeg no ua luaj? Tub Hmoob txawj ntaw, Leej twg yuav tau muab qhov nov coj mus ua pov thawj hais yog thaum twg pab 153 tus Hmoob no raug kev tsim txom dab tsi los ntawm Nplog.
UNHCR hais tawm rau Thaib kom mloog txoj cai, tsis tau pom ib zaug leej twg yuav xa cov neeg muaj ntaub muaj ntawv rov qab. Thiab qhia rau Thaib muaj cov teb chaws thib 3 lav yuav tos cov neeg no lawm xws li Canada, Netherland, Australia, thiab United States. Thov mloog cai ntiaj teb hais. Yawg nom Thaib lag tseg yeej tsis hnov hlo. Cov Hmoob no tsis tseem ceeb dab tsi. Kev phooj ywg ntawm Thaib thiab Nplog tshuav nqi ntau dua 2-3 txoj nyuag siav Hmoob, pauv tau li cas?
Teeb meem Hmoob yeej tsis tag. Cov pem dej dawb yog ib pawg loj. Ze 8,000 tawm leej neeg lawm. Mloog Thaib tsim Hmoob kom txog thaum kawg.

Tus sau: Tsu Yang, NEEG Magazine

Hmoob Cob Fab Tsoo Los Cuag UNHCR Hauv Bangkok, Thailand

Hu txog Hmoob USA, Fab Kis, Canada, thiab lwm teb chaws ntau ntau. Muaj txog li ntawm 200 tawm leej yog cov kwv tij Hmoob tiag tiag tawm pem hav zoov (Cob Fab) los mus thawj rau (the UNHCR) hauv Bangkok, Thailand lawm, lawv xav tau kev pab. Lawv nrog kev txom nyem los dhau 30 xyoo lawm. Thov leej twg nyob qhov twg pab sau ntawv mus rau tom tej tsev nom tswv ntawm nws nyob, US State Department, thiab mus rau UNHCR hauv Thaib teb kom cov kwv tij no muaj txoj kev tawv mus txawv teb chaws. Txoj kev ua neeg toj nam tawg rog txom nyeem neeg lub neej mus tas tsheej phaum neeg. Cov kwv tij Hmoob no twb raug kev txom nyem los dhau 30 xyoo lawm, lawv cov me nyuam uas yug thaum 1975, 76, 77, 78, 79, 80 no muaj hnub nyoog 30 xyoo lawm. Cov me nyuam no yuav cia lis tas lawv txoj kev zoo tiag tiag. Qhov no tsis tseem ceeb lawm tab sis yog lawv cov me nyuam. Thov Hmoob kwv tij, cov muaj kev kawm siab sau ntaub sau ntawv mus tso cov kwv tij no tawm ua zaum kawg ntawm Hmoob txoj kev ua neeg toj nam tawg rog.
Kuv ib leeg yuav hais tsis yeej, hais tsis txaus, thiab hais tsis nti. Thov Hmoob coob coob sib pab, sib cawm, thiab tho ib txog kev rau lawv taug. Thov thiab lo Hmoob. Muaj tej lub caij yog leej twg ntse es nws xav nyob twj ywm kom lwm tus thiaj qhuas hais tias nws ntse no los yuav nyob tsis tau twj ywm lawm. Thov leej ntawd yuav tau pom hais tias ib co neeg yog Hmoob, tseem poob rau hauv txoj kev txom nyem. Qhov txom nyem hauv lub siab lub plawv thiab txom nyem saum daim tawv nqaij tib si lawm. Yog leej twg tau nyeem lawm no pab thiab pab sai.
Tus xa cov lus no: Tub Ntxawg Yaj

Terms of Use | Privacy Notice
© 2002-2007, Neeg Magazine P.O.Box 4071 Appleton, WI 54914-4071 (920) 997-9319
All rights reserved. All parts of this service shall not be reproduced in any form without a written consent express to NEEG Magazine, except that an individual may download and/or print of articles for personal use such as reference,research, and not for commercial purpose. Neeg values all writers with deserved knowledge of their credibility. Thank You.