Anything About Hmong, We post It in this Web Address
___________________________________________________________

Ntiaj Teb Dav Muaj Hmoob Nyob...Kuv nco koj

Kwv tij ces yog niam txiv ib plab yug, niam hlob txiv ntxawm ib txhia yug, thiab yog muam phauj dab laug yug. Phooj ywg ces yog ntu ob leeg twg sib ntsib, sib txoj sib law, thiab nyob ua ke sib tham sib pauv tswv yim haum kev zoo siab. Neej tsa ces rov yog niam tais dab laug, muam phauj yawg laus tsim noob neej los es hu ua neej tsa. Qab ntuj dav hais sua zog ces hu ua Hmoob kwv tij. Hais tiag ntiaj teb dav no muaj Hmoob nyob lawm. Ces ntuj ntawm mas muaj txuj ci zoo zoo tawg paj paug. Tus twb mus ua mab ua suav lawm los muaj. Tus tseem fwm nws tej kwv tij neej tsa los coob, tus nws ntsia ntsia nws, nws hloov tsis tau mus ua leej twg kiag tshuav txhiab txhiab vam vam leej. Tham tag mas twb hais tsis tag, coob tiag tiag hauv lub ntuj dav no muaj yus tej phooj ywg, kwv tij, thiab neej tsa nyob tag. Tus nws yuav yoog rau txoj kev ua neeg dab tsi los qhov ntawd yog qhov yug txoj sia nyob. Qhov ntawd yog qhov cawm tau sawv daws mus ciaj nom ciaj tswv, ciaj faj tim huab tais coj lawm pab pawg me kwv tij neej tsa phooj ywg sawv daws.
Zoo zoo tiag tiag lawm lub qab ntuj no muaj koj thiab kuv nyob. Yog koj nco kuv no koj yuav ua li cas? Ntsia puag sau lub ntuj ntsuab es seev twb ywm rau nruab siab qhia rau koj hais tias koj nco kuv. Tej zaum koj twb tsis paub kuv yog leej twg tab sis txog thaum wb sib ntsib thaum ntawd kuv mam qhia rau koj paub hais tias kuv yog kuv, kuv lub npe hu ua xeeb txob, kuv yog koj dab laug tus tub ntxawg, kuv tseem tsis tau muaj nyab, kuv noj mov hlob, thiab qhov zoo kawg nkaus ces kuv txawj nyeem thiab sau ntawv Hmoob. Puas tau kaj koj siab thaum koj seev li no tag. Txawm yuav kaj koj siab thiab tsis kaj los koj kav tsij rov mus ua yam koj tab tom ua, txawm tias nws yuav yog zaum hauv ib lub hoob kas, tab tom luaj luaj teb los dob dob nplej, ua dab tsi los xij kom koj xav kuv cia.
Yog kuv nco koj, kuv yuav ua li cas? Tsis paub li xyov yuav ua zaj twg thiaj zoo. Tuaj xyuas koj kiag ntshe zoo siab tshaj, pom koj kiag yuav cim tau koj zoo li cas, thiab tau sib tham sib tuav tes mus dab tsi haj yam pauv tau qhov kuv nco koj. KOJ yog leej twg? Leeg twg los tsuav yog koj, thaum lub caij, twg twg tab nyeem ces tus ntawd yog KOJ. Koj yog tus kuv nco tshaj, kuv xav pom, thiab xav paub seb koj nyob qhov twg. Ntiaj teb no cas yuav dav ua luaj, kuv twb paub hais tias muaj koj los kuv tsis tau ntsib koj kiag. Sim neej no xyov wb txoj kev sib ntsib no yuav mus txog thaum twg es thiaj txhob muaj lawm. Xav kom nws zoo li npau suav es wb sib ntsib xwb os yom. Tab txawm nws yuav yog npau suav los ntshe ib leeg twb hais lus rau ib leeg deb deb tuaj xwb twb tuav tsis tau koj tes. Ntshe yuav haj yam kho siab. Txoj kev kho siab hauv niag npau suav cia li yuav ploj thaum kuv tsim nto nruab dab ntub. Kuv yuav chim siab, yuav tsis xav ntseeg tias kuv tau ntsib koj lawm, thiab yuav ntxho kuv siab ntau yam ntxiv.
Oh! xav li cas twb tsis zoo tag nrho. Zaum ntawm no sau rau koj kuv txoj kev nco txog koj xwb. Hnub twg koj pom kuv txoj kev nco koj no ces koj xa xov tuaj piav seb koj nco kuv npaum twg thiab os mog. Nco ntsoo hais tias tsis muaj koj ces yuav tsis muaj kuv thiab. Kuv thiaj xav thiab nco koj tag npaum no. Yog koj nyob saum roob, nram tiaj, los hauv moos los cim ntsoov tseg tias kuv nco koj.
Nyeem kuv nco koj ntxiv hauv lub ntiaj dav no....
Tus Sau: snyu W. Yang

Terms of Use | Privacy Notice
© 2002-2006, Neeg Magazine P.O.Box 4071 Appleton, WI 54914-4071 (920) 997-9319
All rights reserved. All parts of this service shall not be reproduced in any form without a written consent express to NEEG Magazine, except that an individual may download and/or print of articles for personal use such as reference,research, and not for commercial purpose. Neeg values all writers with deserved knowledge of their credibility. Thank You.