Tus sau: Snyu W. Yang, Neeg Magazine,
Published December 30, 2002

Pib thaum lub 5 hlis ntuj xyoo 2002, KajNtug Children's Fund tsheej ib lub koom haum lawm. Koom haum muaj ntau lub, pab lub zej zog sib txawv los sis sib thooj. KajNtug yog ib lub ntawm ntau ntau lub koom haum xav pab cov me nyuam ntsuag, cov puas tes taw puas lub cev, thiab pab cov uas txom nyem dua ntais hauv lub neej. Npaj tau ib tog xyoo, yam twg kuj tsis tau tiav. Nrog nws ib teg dej num, KajNtug yuav tsum faib kom tau me ntsis khoom plig rau cov tsev neeg muaj kev coo pab sab hauv lub vaj tsev. Thaum lub peb caug xyoo tshiab ntawm zos Appleton, WI, lub koom haum thiaj npaj tau ib co khoom rau me nyuam. Thiab tau pab ob tse neeg nyob rau hauv lub zos Appleton. Hu ua "Family Sponsor". Cov khoom siv coj los pab rau ob tse neeg thiab cov thaum lub xyoo tshiab yog ris tsho tiv no, ntawv sau, thiab khoom ua si. Xeeb Lis, Board President, hais tias "cia lwm xyoo kom peb npaj tau txhua yam, yuav rov pab kom tau ntau tsev neeg. Tsis tag li ntawm xwb, lub koom haum yuav nrhiav kev coj los pab rau cov me nyuam uas niam txiv sib rauj, sib ncaim (tas sim neej) kom lawv thiaj tau txais kev pab li lwm tus me nyuam muaj niam txiv." Qhov no yog ib qho ntawm lub koom haum tes dej num thiab lub zog. Nws lub hom phiaj yuav xav pab kom mus txog cov me nyuam tseem nraug kev tuag tshaib, puas tes taw, thiab cov txom nyem dua ntais nyob rau teb chaws America no thiab lwm teb chaws xws li Thaib Teb, Nplog Teb, Nyab Laj Teb, thiab Suav Teb.
Xeeb Lis, hais ntxiv tias, "txawm pab tau li cas xwb los thov kom sawv daws zoo siab. Txhob muab ua ib tug qauv tsis zoo. Vim kev sib pab lawm yav tom ntej mam txawj loj zuj zus mus." Txoj kev sib pab pub rau cov tseem poob rau huav ntu kev ntsaug ntuj, nws yuav yog ib chim tsav ntuj rau leej ntawd. Board President, Lis, thiaj thov li no "vam kom ib tsoom phooj ywg, kwv tij neej tsa Hmoob cev tes tuaj sib txhawb. Tus ho qee tau li cas tuaj txhawb lub koom haum KajNtug los qhov ntawd yuav coj los pib tau ib yam puav pheej lawm yam tom ntej rau lub zej zos Hmoob. Yog li no thov cov niam txiv, kwv tij neej tsa, thiab ib tsoom phooj ywg ho cev tes pab txog das zog, khoom ris tsho hnav, tej yam khoom uas yus tsis siv lawm tab sis lwm tus tseem ntshaw ntshaw, los yog nyiaj txiag tuaj txhawb lub koom haum rau xyoo tshiab tom ntej." Thaum ib txhia pom kev vam meej lawm, sawv daws yuav tau ras hais tias nws haiv neeg tseem txom nyem heev. Koom haum KajNtug thiaj tsim los ua lub teeb pom kev rau cov me nyuam poob rau hauv ntu kev ntsaus ntuj. Kev pab xyoo no nws nyuam qhuav pib. Tsis yog zaum kawg. kev sib pab txog nyiaj txiag los yog lwm yam, tsis tas yuav yog ib teg nyiaj loj loj thiaj mam suav tau ua ib qhov kev pab. Ib lub npib liab xwb yeej yog sib pab thiab tseem cug tau cov me nyuam uas tag kev cia siab lawm lub kua muag poob ib zaug.
K oom haum KajNtug zoo siab tos txais ib tsoom niam txiv, kwv tij neej tsa, thiab phooj ywg Hmoob kom muaj lus nug dab tsi no xa xov mus txog lawv rau ntawm tus xov tooj: (920)997-9319 los sis xa e-mail rau snyu@neeg.org. Lawv yuav tos txais sawv daws txhua lub sij hawm.

Post your comments by e-mailing to: neeg@neeg.org

Terms of Use | Privacy Notice
© 2002, Neeg Magazine P.O.Box 4071 Appleton, WI 54914-4071 (920) 997-9319
All rights reserved. All parts of this service shall not be reproduced in any form without a written consent express to NEEG Magazine, except that an individual may download and/or print of articles for personal use such as reference, non-commercial purpose. Neeg values all writers with deserved knwoledge of their credibility. Thank You.

Purpose
The purpose of NEEG Magazine is to foresee and respond to the communities need for information about:

People, Arts, Infomation, and News(PAIN).
Promoting Hmong's Linguistic, Social structure, and Cultural values (Txuj Ci).