Hmong

Kev Zoo Nkauj Zaum Peb

(The Third Beauty):
Ua li cas Dr. T. thiaj Kawm Tau Ntawv Thaum Nws Ntsib Kev
Nyuab Siab?

Tus sau : Nkauj Hli Yaj (Kao-Ly Yang, Ph.D.)

Dr. T. yog ib kuv tug phooj ywg Hmoob yug nyob Nplog Teb,
tuaj hlob nyob teb Amelicas. Nws yuav yog ib tug tub hluas
Hmoob muaj siab kawm ntawv heev thiab kawm tau ntawv mus deb. Nws kev mus kawm ntawv yeej tsis yooj yim: nws tau ncaim niam ncaim txiv mus tau ntau xyooj, mus Fresno, CA mus nyob rau South Carolina, tsis tag li ntawv, nws tseem
mus nyob tau ob xyoo rau Aaskiv teb. Tam si no, Dr. T. tab tom mus kawm ua ib tug kws kho mob: nws yuav kawm tiam ua ib tug kws kho mob rau lub xyoo yuav tuaj no.

Dr. T. yog ib tug neeg tsis loj tsis siab ntawm lub cev; tab sis, nws yuav yog ib tug neeg muaj kev ntshaw kawm ntawv loj, ntshaw kawm ntawv heev. Vim licas nws yuav rau siab thiab tau mus kawm ntawv nyob ib leeg ntau xyoo ua luaj lino, tseg niam tseg txiv? Ab tsi ua rau nws tuav nws lub siab ruaj nrees thaum txom nyem kho siab tej?
Nej coob tug, cov muaj ntxhais thiab tub, yeej xav paub hais tias ab tsi khi nws lub siab, ntxias nws lub plawv kom nyob hauv daim ntawv xwb? Tej zaum yuav yog kev ntshaw ib lub neej zoo, los sis nws muaj ib lub zeem muag qhov twg, los
sis ntxiv thiab, nws tau ntsib ib yam dab tsi qhia tau rau nws coj los xav ua neej, ua ib tug neeg ntshaw kev kawm ntawv siab thiab ua ib tug neeg zoo? Yog kuv qhia nej hais tias yog dab tsi, tsis paub hais tias nej puas yuav ntseeg? Lino cia kuv piav nws txoj dab neeg rau nej coj mus xav.

Puag thaum Dr. T. muaj 20 Xyoo, nws tau pom ib tug hluas nkauj Hmoob suav uas tuaj Suav teb tuaj rau Amelicas teb; tus hluas nkauj no yeej zoo nkauj heev. Dr. T. tau nyiam nws, nyiam tag siab tag ntsws, yeej xav hais tias xav yuav nws ua poj niam. Lino, hmo ntawd, Dr. T. tau txiav txim siab hais tias mus hais rau nws hais tias xav yuav nws. Rau T., yuav tus hluas nkauj ntawv ces ntshe nws txoj kev kawm ntawv yuav xau mus lino xwb, yuav rov mus kawm los ntshe yuav kawm tsis tau mus deb lawm vim muaj lub neej, poj niam tub se. Lino, xav thiab xav, T. tau xav hais tias mus los tsis mus? Thaum kawg, nws cia li mus zaum ntawm qhov rooj xav seb yuav nkag mus los sis tsis nkag mus ntsib tus hluas nkauj. Thaum ntawv, ua cas muaj ib tug yawm txiv hmoob tseem los txog ntawv. Nws pom T. ces nws cia li nrog T. zaum, nrog T. tham: Me tub, [tus yawm txiv ntawd hais li no rau Dr. T.] yus ua neeg no, tsuas muaj 3 zaug zoo nkauj xwb. Thawj zaug zoo nkauj mas yog thaum yus niam yus txiv yug tau yus los es yus tseem me me thiab ntxim ntxim hlub kawg; tus twg los xav puag yus, tus twg los xav hnia yus nrog yus ua si. Zaum 2 uas yus zoo nkauj mas yog thaum yus tiav kiag hluas nkauj hluas nraug, muaj 15 los sis 16 xyoo ntawd, yus plhu tshiab khiv; tus twg los xav yuav yus, xav hlub yus. Tab sis rau 2 lub sijhawm zoo nkauj no mas, leej twg los yeej tau ntsib ib zaug nyob nws lub neej. Qhov kev zoo nkauj zaum 3 no mas, muaj tsawg tsawg tus thiaj tau xwb nawb. Kev zoo nkauj zaum 3 no mas yog thaum yus mus kawm txuj kawm ci tag tiam los es tus twg los yeej nyiam thiab ntshaw yus; kev zoo nkauj lino mas yog nyiaj thiab kub xwb. Yog koj rau rau siab kawm ntawv, koj yuav ntsib kev zoo nkauj zaum 3 lino uas yog ib txoj kev zoo nkauj yuav kam koj mus tas ib sim neej.

Rau Dr.T., tus yawm txiv no cov lus tau los ua nyiaj ua kub rau nws lub siab, coj nws hla roob hla hav mus kawm txuj kawm ci, txawm muaj tej hmo ua tsis tsaug zog los sis nyuab siab; nws lub plawv yeej dai rawv rau txoj kev ntshaw zoo nkauj ntawd lub fwj chim thiab lub laj lim tswv yim, los ua ib tug neeg muaj ntsej muaj muag nrog luag ua neej nyob. T. tsis paub hais tias tus yawm txiv no yog leej twg thiab yeej tsis ntsib nws li lawm los txog tej hnub no. Ntsib ib pliag xwb, tab si hloov tag nrho T. lub neej: Hmo ntawv, T. siab nqig thiab paub hais tias vim licas yuav tsum rov mus kawm ntawv. Lino, T. rov hmo ntawv rov los tsev, los tu nws cov khoom, yuav sawv ke taig kis mus South Carolina, mus kawm ntawv, tseg kiag tsis yuav tus poj niam no.

Cov neeg ua xav paub seb yuav ua li cas thiaj yuav zoo nkauj mus ib txhis zoo nraug mus tas li, yuav ua li cas es thaum laus tuaj, yus tseem muaj kev zoo nkauj sawv nyob nruab siab, kev zoo nraug sawv nyob nruab plaw? Tej zaum, Dr. T. txoj dab neeg no yuav qhia tau dab tsi pub rau nej -- Tos lino kuv thiaj muab los sau. Tsis tag li ntawd, rau cov tub ntxhais uas xav kawn ntawv mus deb, tab sis pheej ntshai ib tsam lam plam tus me zoo hluas nkauj los sis zoo hluas nraug, Dr. T. zaj dab neeg no yuav qhia thiab pab tau lawm rub lawm lub siab los xav hais tias kev zoo nkauj zoo nraug ntawd daim nqaij daim tawv ces ntshe yeej tsis kav. Tab si yog zoo ntawd kev txawj kev ntse ces ntshe yuav qhib tau ntau txoj kev dav tshaj. Thaum yus ntsib kev zoo nkauj zaum 3, yeej yuav muaj coob tug neeg nyiam yus,

Kao-Ly Yang, Ph.D.

Muaj lus nug dab tsi txog zaj dab neeg no, sau ntawv rau Nkau Hli Yaj lub tsev xa ntawv: kaoly_y@yahoo.com thiab said nws lub website: www.geocities.com/kaoly_y/KaolyYangHome.html

Terms of Use | Privacy Notice
© 2002, Neeg Magazine P.O.Box 4071 Appleton, WI 54914-4071 (920) 997-9319
All rights reserved. All parts of this service shall not be reproduced in any form without a written consent express to NEEG Magazine, except that an individual may download and/or print of articles for personal use such as reference, non-commercial purpose. Neeg values all writers with deserved knwoledge of their credibility. Thank You.

Purpose
The purpose of NEEG Magazine is to foresee and respond to the communities need for information about:

People, Arts, Infomation, and News(PAIN).
Promoting Hmong's Linguistic, Social structure, and Cultural values (Txuj Ci).