2 Kwv Tij Sib Ntsib Ib Pliag

Snyu W. Yang, Neeg Magazine
Posted: July 30, 2002

Ua ib zaug kwv tij es cas thiaj tsis tau nyob sib hlub. TubXyaw khawm kiag nws tij laug duav saum ib lub sam thiaj es nkawv mus raws ib co huab cua ua rau nkawv ob lub cev ua ib ntxaig vau nrog tej huab qaij. Nkawv mus txog rau tom ib lub laj roob muaj muaj hluav kub hnyiab ncho pa cuag li cas ces nkawv txawm pom ib txog kev tawm plua tshauv tog dua ntais puag nram ib lub kwj ha. TubNtxhw, tsa hlo nws sab tes khawm kiag nws tus kwv lub xub pwg. Nws tsis tau hais ib lo lus dab tsi, nkawv ob leeg lub kua muag cia li poob twj ywm nrog tej me huab sawv ntxov ntxaum rau hauv tej plua tshauv uas yog nkawv ob kwv tij maj mam mus kev puag saum ib lub ncov roob ua huab niab.
TX: Taug txoj kev no es ua puas tau luag, puas yuav muaj nyab laj zov kev thiab?
TubNtxhw tsis tau teb li cas ces nkawv twb nqis mus txog rau nram ib tug ntug dej loj loj daj rhuv lawm. Nkawv txawm hnov ib co suab sib tham lis loos ho dhia dej pliv ploov cuag li cas... ces.
TN: Tos me ntsis tso. Koj nyob nov, cia kuv xauj seb yog dab tsi tso?
TubXyaw pom nws tij laug maub loo ua ntej rhais kiag 2-3 ruam tav toj, khiav nqis kiag rau ntawm tus ntug dej taw ntshis nws rab phom rau ib pab nyab laj tseem tab tom ua ua luam dej cuag tus tsi tom plawv dej. TubXyaw ntsia kiag rau sab laug nram hnub poob cas pom kiag muaj ob tug nyab laj twb ua luam dej yov luag dhau rau sab ntug dej tim txoj ncauj ke thiab pom nkawv 2 lub hnab npas laus txaij ntsuab ntsuab ces ob tug nyab laj ntawd txawm laim muag kiag tig tuaj pom nws tij laug.
TX: Tsum tsis txhob tua.
Cov nyab laj 4-5 tug tseem tab tom ua ua luam dej tom plawv dej pom TubNtxhw taw ntshis phom ces lawv cia li raus tob hau cuag tus tsi rau hauv dej tsis tau yeej ces TubNtxhw twb nyem kiag 2-3 lub suab phom mus rau lawv lawm. Thawj thawj lub xwb ces twb raug kiag ib tug nyab laj ua rau nws raus tsis tau taub hau rau hauv dej kom dim. Zuaj tsuag tsuag cov suab phom tag xwb ces nkawv ob kwv tij tig loo khiav rov qab. Nkawv khiav txog deb pem ntav toj lawm txog txog siav thiab ntshai heev tig kiag ntsej muag rau nram qub qab ntsia ces pab niag nyab laj twb khiav caum nkawv qab qw hij haij los lawm ntag.
TX: Tsuag tsuag mas tij laug...
Nws tij laug tseem khiav vau khiav vau los pheej tsis txawj nto pem lub laj roob, TubXyaw tig loo rov qab mus 2-3 ruam cev kiag nws sab tes mus rub kiag nws tij laug sab tes ces nkawv thiaj nce nto plaws rau saum lub laj roob uas ua txoj kev ib nyuag tiaj thiab ua rau nkawv muaj zog khiav me ntsis tuaj. Nkawv thiaj khiav ploj cov niag nyab laj ntawd lub suab qw caum ib pliag zoj. Nkawv ob kwv tij khiav me ntsis ntxiv ces txawm muaj ib txoj kev tshuam los tshuam.
TN: Mus, wb khiav mus nkaum lawm tom no.
TX: Txhob khiav tsuj li koj khiav los pem no tso mam khiav taug txoj kev xwb thiaj tsis muaj neeg paub wb txoj lw.
Nkawv ob kwv tij khiav nkag mus rau nram ib cov hav fab mus nkaum rau nrad. TubXyaw nkag mus pw tsis ua pa rau hauv ib co hav zoov nrog ib co nroj tsuag, nws tig ntsia pom nws tij laug nce tsuag tsuag rau saum ib tsob ntoo.
TX: Txhob nphav ua rau tej ntoo co nyab laj thiaj tsis pom wb.
TN: Koj pw twj ywm hauv koj, kuv nyob saum no kuv mam saib koj mog.

Nkawv ob kwv tij nkaum li no tib pliag zoj xwb ces cov niag nyab laj txawm siv qw thiab ua suab nrov nkhis nkhoos nkhis nkhoos tom laj roob tuaj ntag. TubNtxhw txawm pom nyab laj khiav yuam kev mus txog rau pem ib lub dawm roob cua nplawm vig vwg uas ntsia kiag rau ib txoj kev taug pom tej ntoo thuv thiab txoj kev to tog tsis pom neeg tawm qhov twg li ces pab niag nyab laj ntawm cia li maj mam tig ntsia ntsia tuaj rau ntawm nkawv ob kwv tij qhov chaw nkaum. Cov nyab laj no paub thiab caum neeg zoo li lawv hnov tus ntxhiab tsw ces lawv txawm taug nkawv qab tsawg tsuag los rau ntawm cov hav fab TubXyaw thiab nws tij laug nkawv nkaum. TubXyaw txawm hnov suab phom nrov cuag li cas ib pliag zoj ces muaj 2 tug nyab laj pom nws lub cev nkaum thiab tsis ua pa li lawm, nws hnov lawv tej suab lus hais " div dauv div dau" thiab los muab nws lub cev lov rau sab lov rau sab los nws tsis ua pa li lawm ces 2 tug nyaj laj txawm xav tias tej zaum tuag raug phom tuag lawm lod. Cov nyab laj ntawd ntxawm rov qab mus tawm rau pem cov hav nyom lawm ces TubNtxhw nqis tsuag tsuag saum tsob ntoo los hais lus tias " sawv os sawv" ces TubXyaw sawv kiag los ces nkawv maj mam nkag txav rau pem toj mus zaum twj ywm rau ped. Nkawv pom ib tug nyab laj ntog vau hlo ces txawm siv pom kiag ib tug kws tshuaj nqa ib lub kav kais khiav khiav los khawm nkaus tus nyab laj ntawd. TubXyaw tsa loo nws rab phom yuav luag tua tus poj niam ntawd...ces.
TN: Tsis txhob tua, tus ntawd yog tus kws kho mob xwb.
Ua cas, TubXyaw tig kiag ntsia rau tom nws sab laug ua li cas pom ib cov nyab laj zov npaj phom tsa twj ywm tsis tau pom nkawv ob kwv tij ces nws tsa kiag nws rab phom nyem kiag rau thawj tug ua rau nws ntog zaum ntua ua li cas tseem muaj ib tug zaum tom ntej thiab nws nyem loo ua ib co suab phom ntxiv, zuaj tsuag tsuag 8-9 phom ua rau cov nyab laj uas zoo li cov poj niam ntawd cia li ntog tuag tag kiag lawm.
TN: Khiav wb khiav.
Ces nkawv txawm khiav tav kiag mus rau tom ntej yeej tsis muaj kev li yog hav fab xwb nkawv cia li maub tsawg tsuag khiav vau khiav vau dua ntais puag nram ib lub kwj ha lawm.
TX: Cov niag nyab laj no ua puas yuav mus zov kev rau puag nram txoj kev tid thiab?
Tib pliag zoj ces nkawv txawm nqis mus txog ntua rau nram ib tug me nyuam kwj deg me me TubXyaw khiav ceev me ntse ces nws twb mus nploj poob ua ntej rau puag nram ntej lawm ua li cas nws tig ntsia tseem pheej tsis pom nws tij laug los li.
TX: TubNtxhw Aw!!!! TubNtxhw Awd....
TN: Tos os!!! kuv mam li los kav ntsij mus rau sab tim koj tos.
TubXyaw tig kiag ntsia ua li cas pom nws tij laug caij ib lub nkoj tsawb ua rau cov dej tawg paj paug los pem kwj deg los nws txawm los nkag kiag rau ib lub qab ca poob kiag rau hauv lub pas dej ces nws nqis tawm los tib tug ntub ntub los nws tus kwv cev kiag nws sab tes mus pab rub kiag ces nkawv maj mam maub mus tshwm rau pem ib txoj kev.
TX: Wb mus taug txoj kev no lawm pem no ces koj niam tais lawm nyob rau pem lub zos ped.
TN: Qhov twg!!!?
TX: Kuv twb tuaj xyuas lawv lawm tej kev no kuv paub zoo mas, ua li yog wb mus txog koj niam tais lawv es lawv yuav ua nov wb noj ntshai ib tsam wb txaj muag nev?
Qab kev qaum kev, muaj tauj muaj nqeeb, muaj ib txoj nyuag kev neeg khawb txiav ib theem toj rau ib theem. Qaum ntuj pos huab niab nag tshauv nrov tsig tsuag. Lub ntiaj teb no txia ua lub teb chaws American uas TubXyaw kheev tuaj mus ncig nyob tau ib ntu los lawm. Lub qab ntuj ntxeev hlo rau ib sab lub sij hawm ploj zuj zus hais tsis tag "kuv yuav ncaim koj mus txij li no" rau nws tij laug. TubXyaw txawm qhib qhov muag pom yog 9:00 AM. Yog dej muag tiag tiag ntxaum nws lub plhu ib zaug.

Tus Sau: Snyu W. Yang