Ob Kwv Tij Ntsuag
Kuv tseem nco thaum kuv yau, kuv txiv Yaj Vam Tuam tau hais ib zaj dab neeg txog ob kwv tij rau peb cov nus muag mloog. Zaj dab neeg ntawd piav tawm li no.
Thaum ub muaj ob kwv tij ntsuag nos ua neej nyob. Tus tij hu ua Yob, tus kwv hu ua Kaub. Yob yeej tiav hluas thiab ua tau ub tau no zoo hauj sim lawm. Hos Kaub ces tseem yog me nyuam yaus tsis tau paub tab dab tsi.
Yob, tus tij laug, niaj hmo mus txiav taws thiab mus pauv zog kom tau mov los rau nkawd noj. Yob ua li ntawd tau ib ntus, Yob txawm xav hais tias yog muaj Yob ib leeg xwb nyaj Yob yuav tsis khwv tag npaud. Yib vim yog muaj Kaub thiab Yob thiaj ua hauj lwm hnyav ua luaj. Yob txawm xav tias yog Yob muab kaub tua pov tseg ces yuav tsawg ib lub ncauj ib lub plab.
Muaj ib hnub Yob yuav muab Kaub tua tab sis nws xav tias cia Kaub ua ib pluag mov rau nws noj ua zaum kawg. Nws txawm txib Kaub tias: "Kaub, koj teeb lauj kaub ua mov rau wb noj. Noj mov tas kuv yuav muab koj tua pov tseg vim koj twb pab tsis tau kuv dab tsi li." Kaub thiaj rauv taws. Rauv tau taws Kaub txawm muab ib lub pob zeb coj los teeb thiab muab lub lauj kaub txawb rau saum lub pob zeb. Kawb txawb lub lauj kaub npaum twg los lub lauj kaub pheej plam. Yob thiaj nthe tias: "Koj yuav tuag laud! Pom leej twg teeb lauj kaub es xuas tib lub pob zeb xwb nas? Nrhiav ob lub los ntxiv meb." Kaub thiaj mus nrhiav ob lub los ntxhiv. Thaum muab peb lub pob zeb coj los txhos sib twb li cov ceg kos, lub lauj kaub txawm tsis plam lawm. Kaub thiaj ua mov.
Ua mov txog tog, Yob txawm siv txib Kauj zoj tias: "teeb kiag ib lub lauj kaub ntxiv thiab es yuav hau zaub." Kaub txawm muab ib yav taws coj los teeb ib lub lauj kaub ntxiv. Kaub pheej teeb los lub lauj kaub pheej plam thiab. Yob thiaj rov cem tias: "ruam tag npaum koj ces cia kuv muab koj tua kiag zoo dua. Muab ib ya taws coj los teeb ntxiv thiaj tau vob. Pom tus twg teeb li koj teeb os?" Kaub thiaj mus muab ib yav cav taws coj los teeb ntxiv ces thiaj teeb tau lub lauj kaub khov kho.
Ua zaub mov siav, nkawd ob kwv tij noj tag, Kaub thiaj hais rau Yob tias: " tij laug, koj yuav muab kuv tua pov tseg los tau. Thov cia kuv hais ib zaj dab neeg pub koj mloog tso koj mam tua kuv." Yob thiaj teb Kaub tias, " Tau. Saib koj yuav hais dab tsi txawm hais tsawg tsuag." Kaub thiaj hais tias: "tij laug, kuv me me kuv twb pab tsis tau koj, koj thiaj yuav muab kuv tua. Tab sis tij laug, koj saib ib lub pob zeb xwb twb teeb lauj kaub tsis khov, ib yav cav xwb twb teeb lauj kaub tsis tus. Yog koj ib leeg ces zoo li ib lub pob zeb thiab ib ya taws xwb koj ho yuav zoo dab tsi? Tsim nyog koj pub kuv noj es lwm hnub kuv loj lawm kuv thiaj yuav pab tau koj. Kuv tsuas hais li no xwb, koj tua kuv los kuv yeej zoo siab tuag."
Yob xav xav Yob thiaj los puag nws tus kwv Kaub thiab hais tias: "Me Kaub, kuv twb tsis paub xav, yib vim kuv niaj hnub mus ua zog, kuv sab sab kuv thiaj xav lub siab phem. Kuv yuav tsis hais li rau koj ib zaug li lawm." Nkawv ob kwv tij sib qawg quaj, sib qawg quaj tas Yob txawm tuav Kaub tes rov qab mus tsev lawm.
"Ib sim neej, yog txoj kev nyiaj tshaib yoo nqhis, kev ntshaw luag noj ntshaw luag hnav, kev ua lub neej nyob puab luag rooj puab luag ntsa, kev txom nyem kev tu siab, kev kua muag iab kua muag daw ntshe yuav tawm pawg lug los paug nyob hauv ib luj neej ua ntsuag. Thov hlub cov me nyuam ntsuag ua ib qho puav pheej tseg."
Tus Sau: CZiaSarh N. Yang

 

Back to More Articles