Ib Ntsais Muag Xwb: Ib Lub
Neej Ntais Tag.
Thaum kuv tseem yau kuv txiv kheev nco ntsoov cem peb cov kwv tij hais tias "txhob ntaus yus tus kwv pob! tsam luag tej ntaus yus ces tsis muaj leej twg pab ne." Muaj tseeb kawg, kwv tij Hmoob tog ntuj teb tom qab ua lub neej puag nraim tej laus lo lus zoo. Lub teb chaws tsis thaj yeeb, kwv tij Hmoob ib feem raug rhuav tshem lawv lub neej tus cag siab khiav los mus ua neeg thoj nam tawg rog. Los mus nyob poob teb poob chaw, poob meej mom, poob kev thoob siab koom tsws. Lawv los coj tau ib tug yam ntxwv sib huas noj sib txeeb ua los coj tau ib lub siab tsis sib txig.
Kuv ib tug txiv ntxawm nyob Fab Kis teb hu ua Yaj Tswb no ib sij kaw kab xev los xyuas kuv ces nws txawm hais li no: "cov me nyuam nej tau tso niam txiv tso kwv tij tseg tag, nej tuaj mus ua me noog qej qawg poob qab nrag: hlub hlub tsam tsis muaj tus nthe tus hais nej sawv daws. Tsam luag tus siab loj ces yuav pab pab nej tsis txawj tag tsam tus siab tsis loj tsis dav ces luag yuav ua chawj ua chim rau nej mog." Txawm yog kuv, yog leej twg los yeej txim tsis pom tag kis xyov puas tshav ntuj nws tes dej num li. Twg twg los tsis kam ua siab phem tsam ntuj npam, leej twg los yeej tsis muab txoj cai tsuj ua si. Tag sawv daws nyob hauv txoj qab cai xwb.

"Cas yuav yog ib ntsais muag xwb ib lub neej ntawm leej twg txoj kev ntshaw cia li ntws li tus dej lawm."

Kuv lub neej txoj kev ntshaw yog xav xyaum ua ib tug neeg pej xeem kom zoo muaj kev haum xeeb nrog lub zej zog, muaj laj kam ua, muaj vaj tse nyob, muaj ib lub neej Hmoob ua dog dig xwb zoo ua luaj lawm tiam no. Hos tshuav ib yam uas paug siab tshaj yog cov me nyuam ntsuag lub neej txoj kev txom nyem. Kuv tij laug tseg tau 4 tug me nyuam me me nyob ua ntsuag rau ntiaj teb. Kuv txoj kev ntshaw no yog ib hnub twg kuv lam cawm ciaj ib tug me nyuam ntsuag xwb: zoo puv siab nkaus lawm. Txoj kev tshaw ntawm leej twg lub neej yuav ntws li tus dej lawm yog lwm tus ntsia nws pluag, ntsuag nos, twm zej, thiab tsis muaj kwv tij. Ib ntsais muag xwb ib txoj kev cia siab cia li puas mus tsis rov los. Kuv thiaj tseem nco, kuv txiv kheev cem peb cov kwv tij thaum yau thiab kuv txiv ntxawm tus noog qej qawg poob qab nrag. Xam nuj nuv los tsis paub mus poo npoj.
Anonymous

 

Back to More Articles