Vib Nais Tib Daim Duab

Thaum sib ncaim nyob Thaib Teb leej twg los yeej quaj taug. Tus me nyuam me me nws quaj vim nws niam tsis pub mis rau nws noj. cov hluas nkauj hluas nraug quaj vim niam txiv txiav siab yuav mus rau lwm qhov chaw. Feem ntau yog sib ncaim tuaj mus nyob rau sab ntuj nraum ub. Cov khiav mus li cas los twb muaj coob coob hais tsis tag. Cov niam txiv laus quaj vim lawv yuav sib ncaim mus deb deb yuav tseg neej tseg tsav rau ib tog ntuj dav. Muaj tej tug txiv neej Hmoob quaj vim tso lub teb chaws txoj kev khwv tseg lawm tiag tiag. Nws kho siab heev nws quaj. Cov tub ntsuag ciaj ntsuag no quaj vim nws tsis muaj ib leej txheeb leej ze tuaj hais kev sib ncaim. Zoo npaum no, leej twg los leej ntawd yeej xav quaj. Xav quaj kom nrov nrov seb siab puas kaj.
Thaum cov Luv Mes log ntog nyam hauv lub tshav npas Vib Nais, phooj ywg tej cov sib ncaim khiav sib zuag qee quaj. Sib zog co tes npaum twg los ib leeg yeej yuav tsim pom ib leeg lawm tiag. Npaum no leej twg leej ntawm twb xav quaj. Zos Vib Nais luam tau sawv daws ib leeg ib tug duab tseg cia. Tiam twg yog leej ntawd tseem nyob nws yuav nco hais tias muaj zos Vib Nais.
Thaum kuv ncaim zos Vib Nais yog mus rau pem lub xum Cheng Kham tseem yog Thaib Teb. Kuv lub kua muag sib tw poob vim kuv nco kuv niam kuv txiv heev. Kuv tso lawv pov tseg tom qab hauv Nplog teb lawm. Thaum cov neeg coob li coob tuaj puv lub tsav ncaws npas tag. Kuv ntsia rau lub ntsej muag neeg twg los tsis muaj ib lub zoo sib thooj kuv tsev neeg li. Thaum no kuv xav quaj. Kuv xav qw kom nrov nrov. Kuv lub siab seev tu siab npaum li cas yeej tsis muaj leej twg paub. Tab sis vim tej neeg ntawm kuv nyias kuj quaj nyias lawm thiab. Tej zaum lawv yuav paub tias yog vim li cas kuv ho quaj thiab. Kuv tseem nco tau, kuv cov npawg, Kub Lis, Xeeb Lis, thiab Lwm Lis lawm tuaj xa kuv. Lub caij thaum sawv ntxov ntawd mas kho siab tiag tiag. Thaum ntawd peb cia li tsis muaj leej twg npaj koob thaij duab li. Thaij tsis tau kuv cov npawg no coj los ua ib tug duab thaum lub sij hawm yuav sib ncaim tiag tiag. Daim duab saum toj no yog kuv ib tug phooj ywg hluas nkauj thiab nws ob tug khub cia li lam khiav khiav tuaj hais sib ncaim rau kuv. Nws los keej kawg, thiaj xav zoj tau tias cia peb thaij duab los saib dab muag. Peb cia li sawv zom zaws. Xyov yog leej twg lawm cia li zuaj 2-3 koob duab.
Lub sij hawm thaum kuv quaj nws tsis yog kuv yuav ncaim kuv tus phooj ywg hluas nkauj no kuv quaj. Vim tu kuv siab heev. Kuv nco kuv niam heev tshaj. Tiag tiag kuv thiaj quaj.
Zos Vib Nais yog leej twg qhov chaw kho siab. Kuv nco ntsoov thiab nws yog kuv qhov chaw hnub kuv nco kuv niam tshaj dua ntais huv tib si hauv kuv lub neej. Kuv muaj hmoo kawg nkaus li. Hnub no kuv niam thiab kuv txiv nkawv tau tuaj xyuas kuv rau teb chaws America no lawm. Tab sis kuv tseem nco hnub kuv ncaim Zos Vib Nais uas kuv nco kuv niam heev heev.
Phooj ywg: Snyu W. Yang

Terms of Use | Privacy Notice
© 2002, Neeg Magazine P.O.Box 4071 Appleton, WI 54914-4071 (920) 997-9319
All rights reserved. All parts of this service shall not be reproduced in any form without a written consent express to NEEG Magazine, except that an individual may download and/or print of articles for personal use such as reference, non-commercial purpose. Neeg values all writers with deserved knwoledge of their credibility. Thank You.

Purpose
The purpose of NEEG Magazine is to foresee and respond to the communities need for information about:

People, Arts, Infomation, and News(PAIN).
Promoting Hmong's Linguistic, Social structure, and Cultural values (Txuj Ci).